باش تفيق يا شعبي ولا مازال باش ترقد؟؟

الشعب كي خرج للشارع يصيح و يعيط خرج يطالب ب 4 نقاط كبرى: 


ـ إقصاء التجمعيين نهائيا من الحياة السياسية و محاسبة رؤوس الفساد: ياخي حطولنا المبزع رئيس مؤقت و الجماعة لخرى يفرقوا عليهم في تصاريح الأحزابو حملات إنتخابية 
شئ مالعجب و معتمدين تجمعيين و أمورهم 7 زيت هيا تقولش علينا مازلنا قبل 14 جانفي


 باهي نمشيو للنقطة الثانية: محاسبة القناصة و جميع أعوان الأمن اللي كانت لهم يد في مقتل أبناء شعبنا و تنظيف الداخلية مالخنار لي فيها: جانا الرد حاضر مناضر==> القناصة إشاعة والشهداء أغلبيتهم مالأمن والأمن مسكين يسخف خاطيه غلطوه والداخلية جابولها واحد من أرشيف بن علي إيديه مازامو مسخين بالقديم هاهو يزيد يحمم فيهم بالجديد


ـ قالش الشعب: إستقلال القضاء؟؟؟ قاتلوا الحكومة ==> كلامك يا هذا في النافخات زمرا: جملة من الأحكام المضحكة والمحاكمات الهزلية للطرابلسية واحد يحكموا عليه بشهرين تقولش عليه سرق خبزة و حكة تن و لاخر حكموا عليه ب 6 شهور تعاطي مخدرات والقاضي يقول مالقيت حتى تهمة نوجهالوا و يزيدك سي قيس بن علي يتشخلع و يتمخلع بين تونس و سويسرا و يخرج لا غبار عليه و الراجل متسبب في مقتل 7 من الناس في الوردادين في عملية التهريب متاعوا و و زيدهم زيادة عمكم متاع المبادرة كمال مرجان يمشي يعمل سياحة في مركز الشرطة يهدرز شوية هو و النائب العام و يروح و الشعب من معتصمي القصبة يفرحوا بيهم بالباهي في الداخلية خاطر طالبوا بحقوقهم زايد مع البجبوج حامي حمى الثورة مازال الليستة طويلة.......... إلخ
نختموها بالمطلب الأخير: قلناهكم يجعلش منكم حررولنا الإعلام خلونا نتنفسوا شوية يا رسول الله قناة واحدة تصلح مافماش؟؟؟ حتى لي عاملة روحها جاية باش تنقد من أول حلقة علاء الشابي نطق فيها رصتلوا بايت يبحث للصباح و القناة ذهبت في خبر كان لحقتها جريدة "الصحافة" اللي يقول كلمه الحق يسكرولوا جريدتة و ختموها بإلغاء برنامج " صوت الشعب" معناها بالفلاقي بجبوج يقوللكم يا شعبي " سكر فمك و تبع كي النعامة" لكن لي يزيد يهبلك أكثر هالقرار الجديد اللي طلع بيه البجبوج قالكم يا سيدي بن سيدي فما تشريع جديد تعده لجنة الإعلام والإتصال السمعي البصري، وهي لجنة تابعة للهيئة العليا لتحقيق أهداف الثورة والإصلاح السياسي والتحول الديموقراطي، يتضمن عدة فصول تسمح بحبس الصحفيين معناها اللي مايعجبهمش كلامه إلى بوفردة طوالي هههههههه عاشت حرية الإعلام عاش السبسي "ضامن حرية الإعلام" 
مالأخر نقولكم كلمين يا شعبي ماغير لا نشيح ريقي ياسر هاذم 4 نقاط كاهاو من ضمن برشا نقاط أخرى ماغير لا نحكي عالناس لي هاربة وماجابوهاش و لا فلوسنا لي لبرا و لا الوثائق اللي قاعدة يخفوا فيها و يسبلهوا في الشعب و و و و و و ......إلخ 
عندكم حاجة من ثنين لا غير: يا إما تقروا الأرتيكل هذا و تعملوا طلة تشوفوا مصر لي تعلمت منا الثورة اش عملت و إديروا في قلوبكم و تفزوا بالكم للشارع تنقذوا ما بقي إنقاذه من المسماة "ثورة" و إلا تكملوا سباتكم العميـــــــــــــــــــــــــق و تترحموا على الثورة و خلونا نرجعوا لي ما قبل 14 جانفي و كمال مرجان رئيسنا والمبادرة حزبنا و تثبت علينا كلمة القرد قذافي كي قال "دماء الشهداء سالت على حتى شئ" و نولوا أضحوكة العالم في القرن الحادي والعشرين بعد أن كنا في يوم ما مفخرة العرب
 والسلام

Posted in: